Будьте в курсе последних событий, подпишитесь на обновления сайта
دولة الخلافة العثمانية المزعومة…البداية والسقوط – شبكة الاخبار الحصرية
الثلاثاء , 7 أبريل 2020

دولة الخلافة العثمانية المزعومة…البداية والسقوط

قالوا لنا “أرطغرل غازي”.. تصدى للتتار.. وقعدت قريت خزعبلات في الإنبوكس.. بعضها صمم أنه تصدى لجيوش التتار بـ500 جندي. في بالمناسبة ناس اعترضت وقالت لأ التتار غير المغول.. في مؤرخين فعلًا قالت ده.. وقالت أنهم قبيلتين مختلفين شكلًا وموضوعًا.. لكن الأغلبية قالت أنهم عرق واحد له موطن واحد.. التمايز العرقي بينهم ظهر لاحقًا مع تشتتهم وتزاوجهم بغيرهم من الشعوب.. وعامة العرب أطلقوا على المغول كلمة “التتار” أو التتر.. الأوروبين سموهم “تارتار Tartar”.. كلمة “تتراي” في لغة الترك القديمة تعني “فارس”.. “ابن خلدون” سماهم باسم جديد هو “التَّغزعز”. عامة حبيبي عشان محدش يضحك عليك.. ويقولك “أرطغرل” هزمهم بـ500 جندي.. التتار كانوا بيتحركوا بـ600 – 800 ألف جندي.. وواجهوا “سيف الدين قطز” على الحدود المصرية بالعدد ده تقريبا.. وأول ما وقفوا على حدود سوريا عسكروا في الإسكندرون. مش حيوصلوا للإسكندرون أبدًا لو “أرطغرل” هزمهم.. إلا لو كانت خيولهم بتطير بأجنحة! قال لك “طيب بلاش التتار.. هو حارب الصليبيين وانتصر”.. من كام شهر شفت حلقات من المسلسل عن حروب الصليبيين.. شفتها مع صديق ليا دكتور تاريخ.. حلقات المسلسل كلها رغي ولت ومحتوى ضعيف جدًا.. مسنود بكمية هائلة من الصراخ والدم.. عشان يبدو محتوى قوي. في المسلسل جايبين لنا “فرسان الهيكل The Knights Templar” الأوروبيين.. وهم بيتقدموا للأناضول.. بجيش هائل من عشرات الآلاف.. عشان أكتشفوا أنهم مش حيقدروا يغزو العالم إلا لو قضوا على “أرطغرل” وقبيلته.. قبيلة قايى Kai tribe” …! لاحظ أن العالم وقتها كان دول.. يعني مصر دولة مماليك.. الهند دولة مماليك.. تونس دولة.. المغرب دولة.. روسيا دولة.. العراق دولة.. الجزيرة العربية ممالك.. أوروبا كانت دول وممالك معًا.. بينما الأناضول لسه “قبائل” وعشائر وأسر؛ كأننا في العصر الحجري الثاني.. هم نفسهم معترفين بدا. المهم الصليبيين بيقرروا يقتلوا البطل “أرطغرل” هو والسبعميت نفر اللي معاه.. عشان يعرفوا يحتلوا العالم.. فبيخرج لهم “أرطغرل” بجيش من 500 رجل.. وبيتصدى لهم.. ومبيعرفوش يعتبوا حدود الأناضول.. فبيضطروا يلجأوا للحيلة.. فبيرشوا البعض.. و”أرطغرل” في الميدان بعيد عن مركز الحكم.. عشان يعملوا انقلاب ضده.. ولكن “أرطغرل” بيرجع في اللحظة الأخيرة وينقذ الـ200 نفر الباقيين.. من الإنقلاب الغاشم ده. وبعدين بيقرر “أرطغرل” أنه “الهجوم خير وسيلة للدفاع”.. فبيهجم على قلعة فرسان الهيكل.. وبينقض بالخيول على القلعة بالكام نفر اللي معاه.. وبيذبح ويمزق أوصال الآلاف من فرسان المعبد الصليبيين – أقوى جنود ظهرت في أوروبا عبر تاريخ العالم القديم.. اللي في الصورة دول – وبيحرق القلعة. طيب يا جماعة الخير.. فرسان الهيكل في الوقت دا كان لهم 4 قلاع قريبين من الأناضول.. ينفعوا يبقوا مركز للهجوم.. الأولى في طرابلس اللبنانية.. وقلعة طرابلس دي موجودة لسه مش محروقة ولا اتهدمت.. والاتنين التانيين في قبرص.. ودول أظن صعب “أرطغرل” يعدي البحر بالخيول ويوصل لهم.. والرابعة في عكا.. ودي لو الأخ “ارطغرل” عايز يوصل لها.. فكان لازم الأول يدمر قلعة طرابلس شمال لبنان الأول! ودا محصلش. دي أنهي قلعة تحديدًا بقى؟ تعال نشوف موضوع “أرطغرل والحملات الصليبية” دا بالتواريخ.. ونعرف أد إيه الإعلام ممكن بواسطته الزيف بيتغلغل في العقول ويتلف أجيال.. ويعمل أبطال من ورق بدون أي سند. الحملة الصليبية الأولى كانت سنة 1096.. و”أرطغرل” أتولد سنة 1191. يعني لما تمت مكانش لسه أتولد.. وكان قدامه قرن وخمس سنوات عشان يبدأ يتكون كحيوان منوي أصلًا. الحملة الصليبية الثانية كانت سنة 1145 ميلادية. يعني قبل ميلاد “ارطغرل” بنصف قرن تقريبًا. الحملة الصليبية الثالثة انتهت أصلا سنة 1192.. كان “أرطغرل” عنده تسع شهور! والحملة الصليبية الرابعة كانت سنة 1201 ميلادية.. كان “أرطغرل” عنده عشر سنين… والخامسة كانت سنة 1213 كانت من البحر إلى دمياط. والسادسة كانت 1228.. من صقلية بحرًا عبر قبرص إلى عكا. والسابعة كانت في عام 1249 ضد مصر بقيادة لويس التاسع ملك فرنسا في عهد السلطان الأيوبي الصالح نجم الدين أيوب. والثامنة سنة 1270 كانت عن طريق البحر إلى تونس! والحملة الصليبية التاسعة كانت سنة 1271 بحرًا على مدينة الإسكندرية المصرية! معلش أنهي حملة صليبية بالضبط.. اللي اتصدى لها البطل المغوار “أرطغرل”؟ آه مسلسل لطيف تتفرج عليه مع ساندوتش طعمية وكوباية شاي أسود ثقيل.. تتصاعد أبخرتهم إلى مخك.. فتجيلك حالة من البلادة والغباء.. فتنسى التاريخ والجغرافيا وتقول بابتسامة بلهاء: “ماشي عديها أدينا بنتسلى”.. وتنام على كرسيك قبل الحلقة ما تخلص. لكن من حيث الحقائق التاريخية.. فصديقنا أستاذ التاريخ لما شاف الحلقات معايا بدأ يهذي ولعابه يسيل لا إراديًا وبدأ يبربر.. وبعدين بدأ يمشي وهو نايم.. خدته لصديق ثالث طبيب نفسي يشوف ماله.. بس الطبيب النفسي بعد جلستين مشي وهو نايم لسبب مش مفهوم.. ومش عارفين لحد النهاردة هو راح فين. أنهي حملة صليبية يا جماعة الخير تصدى لها “أرطغرل” وأنهي فرسان معبد دبحهم وقلعة ايه اللي حرقها.. إذا كان فرسان الهيكل الألمان في الحملة الصليبية اللي استولوا فيها على بيت المقدس، انطلقوا من النمسا.. وعسكروا على حدود الأناضول من ناحية بلغاريا.. واحتفلوا وشربوا حتى الثمالة ولموا معسكرهم ودخلوا الأناضول معميين سكرانين طينة.. وعبروها من أولها لآخرها في 10 أيام ودا المعدل العادي للخيول.. والمؤرخين قالوا حرفيًا “ومروا بها دون مشاكل تذكر”. يعني لو “أرطغرل” كان قابلهم وقال لهم “رايحين فين يا رجالة.. بيت المقدس؟ طيب ألف سلامة.. ما تقعدوا تشربوا حاجة؟”.. كانوا اتعطلوا شوية وخدوا 10 أيام ونصف. دا كمان مش كل القوة الألمانية عدت الأناضول.. نصهم فضل فيها يعمل السلب والنهب والاغتصاب.. لحد ما الإمبراطور البيزنطي بعت رسالة للملك الألماني “كونراد الثالث”.. وقال له “عيب وميصحش وعشان خاطري”. أنا مش عارف لقب “غازي” اللي لحقتوه باسم “أرطغرل” دا.. جاي من “غازات” مثلا؟ لأنه الراجل ماتحركش برا الأناضول شبر واحد وماغزاش حد.. ووقت ما حد كان بيهجم عليها زي ما حضراتكم شايفين.. ماتعرفش هو كان فين.. فمستحيل تكون الكلمة جاية من “غزو” إطلاقًا. أنهي حملة صليبية اتصدى لها.. الحملات اللي قبل ما يتولد وللا حملات مجهولة بعدما مات؟ والمغول عبروا الأناضول في وجود “أرطغرل” المغوار الرهيب ووصلوا لسوريا إزاي؟ طاروا في الجو؟ أرجو إننا كده نكون حطينا النقط على الحروف بخصوص الوثن العثماني الخاوي اللي بتحاولوا تأسسوه.. وعريناه وكشفنا زيفه.. عشان نبدأ بقى نتكلم في نشأة “أرطغرل” نفسه.. اللي كل واحد ابنه “عثمان الأول” دفع له قرشين.. ألف له تاريخ فاخر يعجب المستمعين.. فحتلاقي له بالضبط لدى المؤرخين “نشأته بحسب كتاب دستور نامه أنوري”.. “نشأته بحسب كتاب بهجة التواريخ”.. “حسب كتاب جامع الجمعين”.. “بحسب كتاب تواريخ آل عثمان”.. و “بحسب “كتاب جيهان نومة”. فتحتاس وماتعرفلوش أصل.. ولما تواجههم يقولوا لك “أصل نشأته غير معلومة يكتنفها الغموض”! أممال عاملين له مسلسل تاريخي “مبني على أحداث حقيقية” حسب زعمكم إزاي يا أخواننا لما هو “يكتنفه الغموض”.. ومحدش عارف أبوه مين.. ومحدش عارف وقت هجوم الجيوش الأجنبية كان فين؟ بس في مراجع مش بيكتنفها الغموض لحسن الحظ.. خصوصًا المراجع الفارسية والصينية وكتب الأويجور.. اللي كان لهم مهاجرين مستقرين في المنطقة دي.. دونوا تاريخها ونقلوه لأولادهم وتوارثوه جيل بعد جيل.. عشان يصل لنا في النهاية. والقصص دي نتكلم عنها لاحقًا. ويبقى للحديث بقية.

شاهد أيضاً

مؤامرة_اغتيال_فكرة_الفريق ..

اعلام العار الممول..سينتهى قريبا فى البدايه..لازم نفهم محاربة الوزير كامل من داخل العش نفسه بعد …